Friday, October 15, 2010

හිරුත් සඳුත් බිම් ගෙයින් හිම පියල්ලකට!

‎හිරුත් සඳුත් බිම් ගෙයින් හිම පියල්ලකට!

මුහුණුපොතේ කල්පනා සහ ප්‍රසාද් යුවල කවි පොත් යුගලක් ගැන පණිවිඩ තබා තිබුණා අද පාන්දර. මම ඒ පණිවිඩය ඒ ආකාරයෙන්ම මෙහි ලියා තබමින් ඒ කවි යුගල පොත් කිවිවරුන්ගේ කවි පද කීපයක් මෙහි අතුරා තබමි.


"හිරුත් හිම පියල්ලක"-මහින්ද ප්‍රසාද් මස්ඉඹුල, " බිම් ගෙයට සඳ
ඇවිත්"-නඳුන් යසිත ගේ කාව්‍ය සංග්‍රහයන් එළි දැක්වීම ඔක් 17 සවස 2.30 ට
මහවැලි කේන්ද්‍රයේ දී


දෙසුම්-සමන්ත හේරත්, ලාල් හෑගොඩ, තිඹිරියාගම බණ්ඩාර



සිත්තම්කාරී


දබරැඟිලි තුඩු පන්හිඳෙන්
විට කා ඉතිරි වන හුණු සායමෙන්
කාලාන්තරයක් තිස්සේ
කිරි අම්මා ඇඳි රටා මෝස්තර
උළුවස්සයි කුස්සියේ බිත්තියයි
සිත්තම් පොතක් කරගෙන

පුංචි පුංචි තිත් රටා
සිහිකළේම තරු විසුල සුවිසල් ආකාසය
පුංචි පුංචි ග්‍රහලෝක හා
මුළු මහත් චක්‍රාවාටයම

ඒ රටා තබා හිත යට
නව රටා වියූ ලෝකෙක
මා වටා දිළිණි නෙක තරු
ඒ අතරින් මතුවුණේම
කුඩා වියේ පටන් දැකපු
උළුවස්සේ මහ රටාව

එක් යුගයක අග්ගිස්සක
සීතල මන්දාරමකට යටින්
මල් ශාලාවකින් ගෙනා
දෝලාවක තේජසිකින්
ගොක් කොළ රන් වියන් යටින්
සුදු වැලි පාවාඩ මතින්
සය දෙනෙක්ගෙ කරට උඩින්
බෑරක් ගියාය කිරිඅම්මා

විට කා ඉතිරි වුණු හුණු බිඳකින්‍
විශ්වය ගැන
සුවිසල්ම පාඩම කියා දී

හිරුත් හිම පියල්ලක [2010]
මහින්ද ප්‍රසාද් මස්ඉඹුල



මොරටුව

ලී පොලිෂ් ඇඳ පුටු ද පිටපළු
ඉටි කොළ පටු ගෙවල් මුහුදුබඩ
දැති මැ‍ෂින් කුඩු හැලුණ දත් දෙපස
අඩක් හිමි හිටි පිළිම ගස් කඳ

දර කෑලි මිටි බඳින කෙසඟ අත්
පිති කපන කළු කෙට්ටු කොලු ගැටවු
ලොරි කඳෙන් ගස් අදින යකඩ අත්
යතු ගාන උපැස් යුතු මහලු නෙත්

ලිය වැල් ද පලා පෙති නෙළුම් මල්
ලී කඳේ අඟ පසඟ සිපගත්
බීරළු ද මල් ලෑලි ලීස්තර
ජනෙල් නැති ගෙවල් තුළ ඉඩ ගත්

දෙව් රූ ද බලි මුහුණු බෙර කපන
අහඹු කඩ දූවිලි පුස් ගඳ
බෝට්ටු ද ට්‍රෝලර් වැඩපොළ
මුහුදුබඩ වැහි ලිහිණි තිප්පොළ

ලී ඉරන- දරු හඞන- රිය දුවන
කෑගසන වෙන්දේසි මේස පුටු
ක්‍රිකට් පිටි මහ පාර මළ තොරන්
වේළුණු කළු මුහුණු බඩගිනි...

පොළොව මත අන් තැනක සෙවණ සැදු
මුල් බිමේ වැලඳගෙන සෙනෙහෙ දුන්
ආදරය මිය ඇදී වළ දමා
අන් වෙසින් මෙහි ඇවිත් උපදින
තැනින් තැන විකිණෙන වෙසඟන

බිම් ගෙයට සඳ ඇවිත් [2010]
නඳුන් යසිත දසනායක


ප.ලි.

මස්ඉඹුලගේ සිඟිති ඡායාරූපයක් මම සොයා ගත්තේ මුහුණු පොතේ ඔහුගේ පිටුවෙන්. ඒත් නඳුන් යසිත කොළු පැංචා ගේ ඡායාරූපයක් නම් සොයා ගන්න බැරිවුනා මේ අල්ලපනල්ලේ...ඒකට සමාවෙයන් මල්ලියේ.


ප. ප. ලි.

රාවයෙන් ගලවා ගත් මේ රූප රාමුවට තුති වේවා!
17/10/2010 රාවය කලාපයේ පළ වූ ඉසුරු ප්‍රසංගගේ පිළිසඳර කියවන්නටත් මේ ඇරයුම්.

රාවය පිළිසඳර Part 1

රාවය පිළිසඳර Part 2

Thursday, October 14, 2010

ඉන්ද්‍රනාත තේනුවර (නො)දුටු මා

ඉන්ද්‍රනාත තේනුවර මහතා ගැන අමුතුවෙන් ලියා තැබිය යුතු දෙයක් මා හට ඉතිරි වී ඇතැයි මම නොසිතමි. ඔහුගේ ඡායාරූපකරණ පාඨමාලා හදාරමින් සිටිනා සුවහසක් ගෝලයන් ඔහු ගැන මැනවින් දනී. දනන් මුවින් මුව ඔහු හැකියාවන් පිළිබඳ ඇගයීම් වහනය වේ.

මේ පූර්විකා ලීවේ ඔහු විසින් ඇඳි මා රුව රැගත් සිතුවමක් දැකුමින් උපන් සතුටිනි. මාගේ ජීවිතයේ කවර කලෙකවත් මෙවන් ත්‍යාගයක් මා ලබා නැතියෙන් එය සහෘද ඔබ සමග බෙදා ගන්නට සිතුවෙමි.

ඉන්ද්‍රනාත තේනුවර මහතාණෙනි, ඔබට නොවක් තුති.



ප.ලි.

මෙහි ඇති සුවිශේෂි බව නම් ඉන්ද්‍රනාත මහතා විසින් මා කවර කලෙකවත් පියෙවි ඇසින් දැක නැති වීම සහ මගේ ඡායාරූප ගොනුවක මෙයාකාර බැල්මකින් මා සිටිනා කිසිදු ඡායාරූපයක් නැති හෙයින් වෙනස් හැඟුම් සහ කෝණ ඔස්සේ නිරූපිත මාගේ ඡායාරූප කීපයක් බැලීමෙන් මාගේ හැඩරුව පරිකල්පනය ඔස්සේ මවාගෙන මේ සිතුවම ඇඳීමට පෙළඹීමයි. මේ නම් සුවිශේෂී හැකියාවක් බැව් පැවසීම අතිශයෝක්තියක් නොවේ.

පතිනි කාලිය..! අවිච්ඡේද්‍ය විද්‍යුත් හා චුම්බක තරංග කියැවීමක් ලෙස

පතිනි කාලිය..!

රම්භා සේය වුවනත
රතු තිලකයකි නළලත
පතිනි සිරිමා වැනිය දෙනුවන
කාලිය නිදයි හද ගැබ

වේදනාවක් දරා අතීතෙක
බෝදිලිමාට වුව අමතක
කොයි ගොසින් කොයි යම්ද
සත් සියක් පිරිවරට රැවටුන

රත් මල් සුන් බුන්ව විසිරුන
රත් කසී සළු වැතිර වැරහැලිව
මණ්ඩල මිණි පියුම සුපුල්ලිත
ඇතුලත් පිටත් ගැටයුත් න්‍යාසය

මහා පොදු සාධකය
කැටි කළ අන්තරීක්ෂය
ක්වාසාර ස්ඵන්දනය වන
තාරකා දොරටුවයි
පතිනි කාලිය දෝලනය වන

හෂිත අබේවර්ධන

හෂිතගේ මෙම කවිය මාගේ සිත අවුළුවයි. මුල සිට පහලට  පිළිවෙලින් එන වචන මසිත විවිධාකාර වූ සිතිවිලි රූපකායන් සහ ඒ සංඥාර්ථයන් හා බැඳුනු පුරාණෝක්ති සහ භෞතික විද්‍යාත්මක කතන්දර එකට පැටලී ගිනි දළුලයි. එම ඇවිලිල්ලෙන් යමක් ශේෂ වන්නේ ද ඒ මේ සටහනයි.

අප දන්නා විශ්වය අවසාන වශයෙන් තැනී ඇත්තේ ශක්තියෙනි [Energy]. ශක්තියේ විවිධ ප්‍රබේධ වලිනි. ස්වරූප වලිනි. අන්තරීක්ෂ කිරණ යනු විශ්වයේ හටගැන්මේ පටන්ම සකලවිධ දිශාවන් හි සමාන්තරව ගලා යන සූක්ෂම ශක්ති විශේෂයකි. එය විශ්වයේ සෑම තැනම එකකාරව පවතී. සමහරු මෙයට විශ්ව ශක්ති යැයි පවසනවා ද විය හැකිය. කෙසේ වුවද මෙම පසුබිම් ශක්ති විශේෂය පවතින්නේ තරංගමය ස්වරූපයකිනි.[4] සියළු ශක්ති තරංගමය ස්වරූපයෙන් විශ්වය පුරා සැරිසරයි. ‍තරංගයක කිසියම් ආකාරයක උස් පහත් වීමක් හෝ කිසියම් භෞතික මිනුමක උච්ඡාවචනයක් පවතී. එම විචලනය කාලය ඔස්සේ සිදුවන්නක් බැවින් සියළු තරංග ශක්ති සම්ප්‍රේෂණයේ යෙදෙයි.

විශ්වයේ ශක්තිය ගලා යාමේ විශාල කාර්යභාරයක් විද්‍යුත් චුම්භක තරංග හරහා සිදු වේ [Electromagnetic Wave]. මේ විද්‍යුත් චුම්භක තරංග යනු ම එකිනෙකින් ස්වායත්ත පැවැත්මක් සහිත භෞතික රාශින් ද්විත්වයක අන්‍යොන්‍ය සහභාගීත්වයෙන් ක්‍රියාත්මක වන ශක්ති විශේෂයකි. විද්‍යුත් චුම්භක තරංග යන යෙදුමෙන්ම මේ ක්ෂේත්‍රයන් දෙක විභාග වේ. විද්‍යුත් ක්ෂේත්‍රයත් [Electric Field] චුම්භක ක්ෂේත්‍රයත් [Magnetic Field] යන ද්විප්‍රකාර ක්ෂේත්‍රයන්ගේ සාමුහිකත්වයෙන් ආලෝකය ඇතුළු සියළු තරංගමය ‍භෞතිකයන් ඉපදී ඇත. මෙම තරංගයෝ සයිනාකාර [sinusoidal wave] වෙති. උච්ඡාවචනය වෙති. සිය කාලය හරහා ගමනේ වේගය ආලෝකයේ නියත වේගය වෙති. එනයින් විද්‍යුත් චුම්භක තරංගයෝ විශ්වයේ රහස් තැනින් තැන ගෙන යන වාහකයෝ වෙති. මේ සත්තාවන් ඉපැරණියෝ විසින් දේවත්වයට හරවා වැඳුම් පිදුම් කිරීම පුදුමයක් නොවේ. ග්‍රීක දේව පුරාණයේ පවා අපට හමු වන ඊ‍කො[Eco] සහ නාසිසස් [Narcissus] යනු එකල ශබ්දයේ සහ ආලෝකයේ භෞතික නියමයන් අතරින් සුපතල පරාවර්තන නියමයන් පරම්පරාවෙන් පරම්පරාවට මුඛ පරම්පරාවෙන් දැනුම වහනය පිණිස ගොඩ නැගුණු කතන්දර විය හැකිය. ඒවායේ ද අවසානයේ ‍භෞතික නියමයන් දෙවියන්ට ආරෝපණය වී ඇත්තේය. මිනිස් විෂය සීමා අතික්‍රමණය නොවන තැන් දේවාරෝපණය ලද්දෙන් ශක්තියේ භෞතිකත්වය ඉක්මවා ගිය සියළු තැන් දේවත්වයට සමාරෝපණය වූයේ යැයි කීමෙහි වරදක් නැත.

දැන් මේ කවිය දෙසට හැරී බැලූ කල අප දකින්නේ ද්විප්‍රකාර වූ ශක්ති සංකේතකරණයකට ලක් වී ඇති ආකාරයකි. එක අතකින් සිංහල බෞද්ධයන් අදහන භාරත මූලයන් සහිත දේව සංකල්පනා අතරින් පත්තිනි දෙවියන්, අතිශය ආනුභාව සම්පන්න වන අතර ශුභ දේ කෙරෙහි සහ දරුවන් කෙරෙහි බලය පාන දේවතාවියක ලෙස පිළිගන්නා අතර ඊට ප්‍රතිපක්ෂව කාලි, දේවතාවියකට වඩා යක්ෂණියක් ලෙස පිළිගැනුමේ පවතින බැව් පොතපතේ සඳහන්ය. කෙසේ නමුදු සිංහල දේව පුරාණයේ සඳහන් වන්නේ ඇය මුලින් යක්ෂණියකව සිට පසුව දේවත්වයට පත් වී ඇති බවකි.[1]. මෙනයින් ශූභ කාරණා සම්බන්ධව ඇති විෂය ක්ෂේත්‍රයක් මෙන් ම අශුභ කාරණා සබැඳි විෂය ක්ෂේත්‍රයක් ද යනාකාරයෙන් ද්විත්ව ප්‍රතියෝග බල ක්ෂේත්‍රයන් ඝට්ටනය කිරීමට මේ කවියේ සංකේතීය ලෙස පත්තිනි සහ කාලි යෙදුම් උපයෝගී වී ඇත. මෙනයින් උපදින පත්තිනි වැනි දේවතාවියකගේ ගුණ ඇත්තියක, රම්භා වැනි අතිශෝබමාන දේවතාවියකගේ වැනි රූ ඇත්තියකගේ හදවත සැණෙකින්, කාලි වැනි යක්ෂණියකගේ හෝ රෞද්‍ර දේවතාවියකගේ ගතිගුණ හා බැඳ දැක්වීම, කලින් සඳහන් කළ ආකාරයේම එකිනෙක ප්‍රතිවිරෝධි හෝ නොපෑහෙන ශක්ති ද්වයක ඒකත්වය තුළින් ජනනය වන විද්‍යුත් චුම්බක කිරණයක් මෙන් වූ මනුෂ්‍යත්වයේ ස්වභාවය, මේ කවියේ ගැඹුරුම පත්ල බැව් මගේ වැටහීමයි.

මෙබඳු ද්විත්වයක සමා‍යෝජනය මැක්ස්වෙල් [Maxwell Equations] සමීකරණ පද්ධතියේ ප්‍රතිඵල ලෙස විද්‍යුත් චුම්භක තරංගාකාර ව්‍යුහයන් ජනනය වීම හා කදිමට සැසඳේ. එම සමීකරණ විසඳීමේ දුරවබෝධී පියවරයන් මෙන්ම මනුෂ්‍යා විසින් නිර්මිත දේව සංකල්ප ද මතුපිටින් අවබෝධය දුෂ්කරය යන්න‍ මගේ වැටහීමයි.

එබැවින් මේ සඳහන් වන ඇතුලත් පිටත් විසඳුම දුෂ්කර න්‍යාසය [Matrices, Matrixes] යනු මේ ශක්ති ස්වරූපයන් දෙක එකිනෙකින් වෙන්කර ගැනීමට මිනිසා දක්වන අසාර්ථකත්වය පිළිබඳ කදිම ඇඟවුමකි.

න්‍යාස යනු උසස් ගණිතයේ හමු වන සංකල්ප පද්ධතියකි. ඒවා අනුසාරයෙන් විචල්‍යයන් බොහෝ ඇති ගණිත සමීකරණ විසඳිය හැකි තත්වයට පෙරලා ගැනීමේ තාක්ෂණය නිමැවී ඇත්තේ විසඳුමක් ඇති හෝ නැති අවස්ථාව විශද කර ගැනීමේ අවශ්‍යතා විසිනුත්, පරිගනක ආශ්‍රිත වේගයෙන් ගණිතමය සමීකරණ විසඳීමේ ඇල්ගොරිතම නිර්මාණය කර ගැනීමටත් වශයෙන් එය වඩාත් ලං වන්නේ යාන්ත්‍රිකකරණය වූ ගණිතමය පෙදෙසක් ලෙසිනි.

අතිශය පැරණි ශාස්ත්‍රයක් වන ජ්‍යොතිශය වැනි විෂයක පවා ග්‍රහ තාරකාවන් දේවත්වය ට පැමිණ වීමත්, ඒ ඒ ග්‍රහයන්ට අදාලව විවිධ සුවිශේෂී නෛසර්ගික ගතිගුණ ආරෝපණය කිරීමත්, අනන්‍ය ලෙස විවිධ වර්ණ ඒ ඒ දෙවියන්ට සංකේතීයව යොදා තිබීමත් යනාදී  සාධක හේතුවෙන් විසින් මතු කරන අනෙක් කාරණාව නම් දෙවියන්ට අදාල භෞතික විද්‍යාවක් තුළ එම විද්‍යුත් චුම්භක තරංග වල ගති සොබා වෙන් වී ඇති බවයි. මේ වැඩි දුර අධ්‍යයනය කළ යුතු විශය ක්‍ෂේත්‍රයක් වන්නේ එබැවිනි. උදාහරණයක් ලෙස වික්‍රමයට අධිපති ලෙස සැළකෙන් කුජ ග්‍රහයාට අයත් වර්ණය රතුය. එම ග්‍රහයා වස්තු විෂය වන්නා වූ ක්ෂේත්‍රය වඩාත් ලංව පරීක්ෂා කළ විට එහි ගතිගුණ සංකේතීකරණය වන්නා වූ ආකාරය පහත දැක්වෙන පරිදි සාරාංශ කළ හැකිය.

රූප ස්වභාවය යටතේ කෲර, රතු ඇස් ඇති, චපල, පපුව පළල්, පිත් අධික, ක්‍රෝධ ඇති ,නහර ඉල්පි, ශක්තිමත්, මධ්‍යම ප්‍රමාණ ශරීරයක් ඇති, ප්‍රඥාවත්, රතිකෙළියෙහි ලොල් වූ , ඔටුන්නක් හිස පැළඳි රූපයකි.

වාහනය-මොණරා
ආයුධය-රණ අංකුසය
වාසස්ථාන-අග්නිස්ථානය
ස්ත්‍රී/පුරුෂ-පුරුෂ
කෲර/ සෞම්‍ය-කෲර
වණීය-ලේ රත
වංශය-ක්ෂත්‍රිය
නිලය-සේනාධිපති
අවතාරය-නරසිංහ
දිසාබල-දකුණ

උපුටනය ජීවිතය හා ග්‍රහයෝ හෙන්ද්‍රික් ද සිල්වා හෙට්ටිගොඩ පිටුව 99

දැන් මෙයාකාර වූ ශක්ති විස්තර වන්නාවූ කුජ ග්‍රහයා සංකේතීය ලෙස මිනිස් ස්වභාවයන් ද ‍භෞතික රාශි ගුණ ස්වභාවයන් ද යනාදී වූ ද්විත්වප්‍රකාර වූ සොබාවන් දරයි. මේ මිනිසා සිය දැනුම නිපදවීමේ මුල් අවදි තුළ ‍භෞතික ශක්ති හඳුනා ගන්නට දැරූ උත්සාහයත්, ඒවායේ ඇති වත්මන් තතු හා සැසඳෙන විද්‍යාත්මක කරුණු කාරණා සමග ඇති සම්බන්ධයත් මැනවින් පෙනේ. අඟහරු ග්‍රහයාගේ ප්‍රභාව හෝ එහි සාපේක්ශ විශාලත්වය හෝ එහි බැමුම යනාදී දේ විවිධ අන්‍යාර්ථයෙන් පිළිබිඹු වීමක් මේ වසර දහස් ගණනක් පැරණි හැඟවුම් තුළ වෙයි. මෙනයින් වර්තමාන‍යේ විද්‍යුත් චුම්භක තරංග පිළිබඳව මැක්ස්වෙල් සමීකරණ අපව සිරකරන දුරවබෝධයම මෙම ජ්‍යොතිශ සිද්ධාන්තවලට පසුබිම් සපයන මෙවැනි අතිශය ගුප්ත සංකේතීකරණයන් විසින් ද සපයයි.

පත්තිනිය ගින්නෙන් ,මලෙන්, අඹෙන් ආදියෙන් සත්වාරයක් උපන් හෙයින් "සත් පත්තිනි" යැයිද දොළොස් වාරයක් "දොළොස් පත්තිනි" යැයි ද සඳහන් වන්නීය. මේ උපන් කථා පිළිබඳ විවිධ මත ජනප්‍රවාදයේ ඇත. එනම් දෙමට මලෙන්, ගනි කඳෙන්, නයි කඳුලෙන්, විදුලියෙන් ,පිනි බින්දුවෙන් ,සිඟාරැල්ලෙන්, මවිත අඹෙන් ,සළු පොටෙන්, නුග පත්‍රයෙන් ,කදුරු පොත්තෙන්, හෙණයෙන්, ජලයෙන් යනුවෙනි.

සිංහල දේවපුරාණය 284 පිටුව

මේ ආකාරයෙන් දේව සංකල්ප උපදනා ස්ථාන අතර ශක්ති අවස්ථාද වන බැවින් උක්ත ධර්මතාව කදිමට පැහැදිලි වන්නේ යැයි ඉඟි සැපයිය හැකිය. අනෙක් අතට දේවතාවන් උත්පත්තිය ලද අයුරු දැක්වෙන ප්‍රවාද වලද බොහෝ විට දැක්වෙන්නේ මේ හා සමාන ශක්ති ස්වරූප ආශ්‍රය කරගෙන බැව් වැඩි දුර සොයා බැලීමෙන් දත හැකිය. එකම ශක්ති ප්‍රබේධයක් ද බොහෝ ශක්ති ස්වරූපවලින් උපත ලබන්නටත් පරිවර්තනය වන්නටත් හැකියාව ඇත්තේය. උදාහරණයක් ලෙස බැටරි කෝෂයක අන්තර්ගත රසායන ද්‍රව්‍ය එකිනෙක ප්‍රතික්‍රියාවෙන් රසායන ශක්තියෙන් විද්‍යුත් ශක්තිය ද නැවත එම විද්‍යුත් ශක්තිය විදුලි බුබුලක් හරහා යද්දී ආලෝක ශක්තියට ද තාප ශක්තියට ද යනාදී වශයෙන් පරිවර්තනය වෙමින් අනවරතව ගලා යයි. 'ශක්තිය කිසිදා නොනැසේය' යන්න භෞතික විද්‍යාවේ ප්‍රකට ප්‍රවාදයකි. අයින්ස්ටයින් ශක්තිය සහ පදාර්ථය අතර පරිවර්තන සමීකරණය ලොවට හඳුන්වා දුන්නේය. ඉන් ඔබ්බෙන් ශක්තිය සහ පදාර්ථය මෙන්ම අවකාශය හා ගුරුත්වය අතරද සම්බන්ධතා වැඩි දියුණු කර ඇත්තේය.
කවරාකාරයෙන් කීවත් වර්තමාන විද්‍යාව විසින් අත්පත් කරගනිමින් සිටිනා භෞතික විද්‍යා දැනුමේ ප්‍රාථමික ස්වරූපයන් දේවසංකල්ප තුළ ගිලී ඇති බැව් කෙටියෙන් මතුරමි.

මේ කව හරහා අපව කුළු ගන්වන මේ මනස් සිතුවම එහි දුරවබෝධ පෙදෙස් කෙරෙහි අප සිතුම් මෙහෙයවන ඒ ස්වභාවය, කවියක් රිද්ම ලක්ෂණ ඔස්සේ, ව්‍යංගාර්ථ ඔස්සේ නව දැනුමකට අපව මෙහෙය වන්නට ඇති විභවය පිළිබඳ කදිම නිදර්ශනයක් සපයන්නේ යැයි මට සිතේ.
ගැහැණියගේ සංකීර්ණතාව ය පළ කරන මේ 'උසස් ගණිතමය' කාව්‍ය යනු එතරම්ම කේඕටික [Chaotic, වියවුල්] න්‍යාසයකි.

බෝදිලිමා ගැබිනියක ගේ ප්‍රසව වේදනාත්මක හඩ හා සමාන හඩක් නිකුත් කරන අවතාරයකැයි පොතපතේ සඳහන් ය. කාලි හෝ පත්තිනි හෝ රම්භා යනුද විවිධ අවතාරය. අවතාරය යනුද දේවත්වය හා සබැඳි සංකල්පයෝය. ශක්ති විශේෂ හඳුනා වෙන්කර ගැනීමට පුරාතනයන් යෙදූ සංකේතයෝය. ඒවා මැක්ස්වෙල් සමීකරණයේ හෝ කේඕටික් [Chaotic]සිද්ධාන්ත අස්සේ සැඟවී සිටිති.

දෝලනය වන්නා වූ දෙයක් තරංගයක් වීමට ඇති ඉඩකඩ ඉමහත්ය. පත්තිනි සහ කාලි දේවතා දෝලනය තුළ හැඟවුම් වන තරංගාකාර ශක්ති පරිවර්තනය විද්‍යුත් චුම්භක තරංගාකාර ‍භෞතිකයක් අප වෙත ගෙන හැර පායි. මිනිස් මනසේ ගැඹුර ස්පර්ශ කරමින් ලියැවුනු මේ කව ඒ තරම්ම සංයුක්ත අතීත සහ වර්තමාන දැනුම එකිනෙක ගැටීමේ තෝතැන්නක් ද නිර්මාණය කරන බැව් මගේ අදහසයි.

Somehow the wondrous promise of the earth is that there are things beautiful in it,things wondrous and alluring,and by virtue of your trade you want to understand them. Mitchell J. Feigenbaum-Gleick, p. 187.

ප.ලි.

හෂිත අබේවර්ධන ලියූ මේ කවිය මා ඇස ගැටුන මොහොතේම ලංකාවේ "සිංහල දේව පුරාණය" මා සතු නොවීම ගැන කනස්සල්ලක් ඉපදුනි. මම වහා හෂිතට දුරකතන ඇමතුමක් දුන්නේ පසුගිය පොත් සල්පිලෙන් "සිංහල දේව පුරාණය" පොත ඔහු මිල දී ගත් බැව් මගේ මතකයේ තිබු බැවිනි. අවශ්‍ය පිටු කීපය ඔහු මා වෙත සැණින් ඊමේල් කළ බැවින් මගේ කර්තව්‍ය පහසු විය. පළමුව කවිය ලිවීමටත් දෙවනුව "සිංහල දේව පුරාණය" කෘතියේ කාලි පත්තිනි විස්තර පිටු මා වෙත ලැබෙන්නට සැලැස්වීම පිළිබඳවත් හෂිතට මගේ ස්තුතිය පිරිනමමි‍.


න්‍යාස පිළිබඳ කවියේ එන යෙදුම විග්‍රහ කිරීමට තවත් ප්‍රදේශයකින් ඇතුළු විය හැකිය. එනම් ගැබක් හට ගැනීමේ යාන්ත්‍රණය [Embryology] තුළ සිදුවන තොරතුරු ප්‍රචාලනය වීම පිළිබඳ ඇති ප්‍රවාදාත්මක එළඹුමයි. මේ ගැන ලිවීමට කාලයත් අවකාශයත් ඇවැසිය.මතුවට තබමි එය.


ආශ්‍රිත ග්‍රන්ථ:

1. සිංහල දේවපුරාණය-ධර්මදාස/තුන්දෙනිය 1994
2.පුරාණෝක්ති සංග්‍රහය මහාචාර්ය සුනන්ද මහේන්ද්‍ර
3. ජීවිතය හා ග්‍රහයෝ-හෙන්ද්‍රික් ද සිල්වා හෙට්ටිගොඩ
4. A Student’s Guide to Maxwell’s Equations-DANIEL FLEISCH-Wittenberg University
5. A Brief History of Time-Stephen Hawking
6. Chaos Theory-The Essentials for Military Applications-Glenn E. James Major, U.S. Air Force
7. මහා සිංහල ශබ්දකෝෂය-ගුණසේන

ග්‍රැෆිකයේ දැක්වෙන්නේ නට්‍රාජ් අනුරුවකි. උපුටා ගත්තේ මෙතැනිනි.

හෂිත අබේවර්ධන ගේ උපන් දිනය වන අද දින 14/10/2010 ලියැවුනු මේ ලිපිය ඔහුට ත්‍යාගයක් වේවා!

Wednesday, October 13, 2010

ගෝත්‍රික ප්‍රේමය සහ මුහුණු පොත

ගෝත්‍රික ප්‍රේමය...


මට හදිසියේ අනෝමා රාජකරුණා මතක් වුනා.

මම මුහුණුපොතේ වැඩකට ඇති යමක් කතා කරන්න සුදුසු හික්මීමක් ඇති මිනිසුන් සොයා වෙහෙසෙන නිසාවෙන්, මා දන්නා කියවා ඇති පොත් ලිපි ලේඛන සහ සමාජ- සංස්කෘතික- මාධ්‍ය වැනි ක්ෂේත්‍රවල ප්‍රාමාණික උගතුන් සහ ක්‍රියාකාරිකයන් සහ කතෘවරුන් සොයා ඔවුන් මුහුණුපොතේ ජීවත් වන්නේ නම් ඔවුන් සමග සම්බන්ධ වීමට මම උත්සාහ කරමින් සිටිමි. මේ ආකාරයෙන්ම අනෝමා ද මුහුණු පොතේ ඉන්නා බව දුටුවෙන් ඇයට ද "ෆ්‍රෙන්ඩ් රික්වෙස්ට්" දමා බලා සිටියෙමි. කීප ගමනක් ම ඒවා වැඩ නොකලෙන් පසුව පණිවිඩයක් සමග ද එවැනි ඇරියුමක් කළෙමි. ඊට ද ප්‍රතිචාර නැතිවූයෙන් ඇය ගැන සොයා බැලීමට සිත් වුණි.

මේ ඒ සොයා බැලීමෙන් ලද ප්‍රතිචාර කීපයක් සටහන් කර තැබීමකි.

Dawson Preethi:
මම අනෝමා රාජකරුණා දැකල නැහැ. මේ ඉන්නේ එයාම ද? ගෝත්‍රික කවි -මට හරියට මතක නැහැ ගෝත්‍රික ප්‍රේමය ද කොහෙද ඒ පොතේ නම-ඒ කවි පොත මගේ ළඟ තිබිල දැන් අවතැන් වෙලා -මහ අමුතු කවි තියෙන පොතක් ඒක- ඒ පොත ලියූ කෙනාද කියල කියනව ද කවුරු හරි?

Prasad Weerasekara:
Ow me anoma thamai... gothrika premaya anoma karapu palaweni kavi potha mama danna vidiyata. anoma eka gana sanvadayak thibba 2000 vithara vibavi eke. anoma photography karana nisa e dawas wala eya gatta 4tos ehemath me pothata ekathu karala thibba. sanwadayedi jayathilaka kammallaweera saha tenisan perera pradanna lesa eda katha kala... danata wasara 10 kata vithara kalin.. Thilinaa veerasinghe ganath katha bahata lak unaa mathakai

Kasun Indi:
මේ ඉන්නෙ අනෝමා රාජකරුණා තමයි. මම ෆොටෝ එකකින් මීට ඉස්සර දැකල තියෙනවා.

Hashitha Abeywardana:
meya athamayi

Dawson Preethi:
අහා එහෙමද? මම අනෝමාගේ ගෝත්‍රික ප්‍රේමය කවි පොතට පුදුම කැමතියි. ඒ පොත දැන් කඩේ ගන්නත් නැහැ සොයල බැලුවම. ඒ පොතේ කොපියක් සොයා ගන්න ක්‍රමයක් කියනවද කවුරු හරි?


මම අ‍නෝමට "ෆ්‍රෙන්ඩ් රික්වෙස්ට්" හතරක් දැම්මත් එකක්වත් "ඇක්සෙප්ට්" කරල නැති නිසා අහන්න... වෙන්නේ වෙන අයගෙන් තමයි මේ පොත් ගැන....

Hashitha Abeywardana:
potha dakkoth argannam..!

Dawson Preethi:
ha

Anjula Rasanga:
She hardly visits her FB page :) If you want i'll get her in touch with you

Dawson Preethi:
thank you in advance, pls go ahead Anjula.


Wipula Sumanasekera:
ඩෝසන් ... පින්තූරයේ ඉන්නේ .... අනෝමා රාජකරුණා මෙයාම තමයි... මගේ යාළුවෙක්... මෙයා මාත් එක්ක ඒකාලේ රූපවාහිනී/සිනමා පාඨමාලා හැදෑරුවා... මේ ළඟදිත් ලංකාවට ගිය දවසෙදිම හම්බුවුනා. වැඩ කරන්නේ ප්‍රංස මිත්‍ර සංගමයේ. [ France Allionse] අර ''බොන්සුවා'' කියන රූපවාහිනී වැඩසටහනේ නිෂ්පාදිකාව..කාර්යාලය තියෙන්නේ ඈස්වාට්ටුව දෙසින් බාන්ස් පෙදෙසට ඈතුළු වුනාම මීටර් 50ක් දුරින්..වම් පැත්තේ....ශූක්‍රධාතු විකුණන බැංකුවක් තියෙනවා...ඒකට අල්ලපු තැන...

Krishan Rajapakshe:
ඩෝසන් කාන්තාව හා මාධ්‍ය සංසදයෙන් ඈහුවොත් පොත ගන්න තියෙන තැනක් හොයා ගන්න පුළුවන් වෙයි...

Dawson Preethi:
ස්තුතියි විපුලටත් ක්‍රිෂාන්ටත්!

Wipula Sumanasekera:
ක්‍රිෂාන්ගෙ කොමෙන්ට් එකෙන් තව දෙයක් මතක් වුනා. ඈත්ත, අනෝමා ඔය ස්ත්‍රී කියලා ඉන්න අමුතු සත්වයෙක් ගැන පමණක් කතා කරන සංසදයක මාධ්‍ය කේන්ද්‍රයක ඉන්නවා 1996 වසරේ පලවූ මගේ ''සිටු කුලයේ ප්‍රේමයක්'' කෙටිකතා පොතේ ඈති ''හිප්‍රොක්‍රටිස්ගේ පුත්‍රයා'' ...කෙටිකතාව ඔය මාධ්‍ය කේන්ද්‍රය මගින් පලකරන සඟරාවේ පල කරන්නට අවසරගන්න ආවා මං එකල වැඩ කළ යං ඒෂියා ටෙලිවිෂන් එකට. මං කිව්වා මේක ස්ත්‍රී වර්ගයාට හෝ පුරුෂ වර්ගයාට කළ නිර්මාණයක් නෙවෙයි. ''මනුෂ්‍ය වර්ගයා'' වෙනුවෙන් කළ එකක් කියලා.ඈයි මේ ස්ත්‍රී පුරුෂ භේදයක්. තියෙන ඒවා මදිවටද? කොහොම හරි මගෙන් අවසර අරන් ගියා ''වචනයක් '' වත් කපන්නේ නැතිව පලකරනවා. පිටපතකුත් ගෙනත් දෙනවා කියලා. අද වෙනතුරු ඒ පිටපත නම් ඔය කියන ස්ත්‍රී වර්ගයාගෙන් මට ලැබුනේ නෑ. නමුත් ඒක එලෙසින් පලවෙලා තිබුනා ....මං ඒක මනුෂ්‍යයින් වෙනුවෙන් සං සමග මියෙන තුරුම එකට සිටි නියම මානවවාදී කාන්තාවක වූ '' ජෛයරාණී '' ඈගේ නිවසේදී මෙය පෙන්වා මට හොඳටම දෙස් තිබ්බා ඔය ස්ත්‍රී මාධ්‍ය සංසදය ගැන. සමාවෙන්න ඩෝසන්

Dawson Preethi
eka maru keti kathawak eththatama ,,sthuthi wipula beda gaththtata...

ප.ලි.

මේ ආකාරයටම සොයා බැලීමක් ධර්මසිරි බණ්ඩාරනායක ගැනද කරන්නට අවශ්‍යය. මා කීප වතාවක්ම "ෆ්‍රෙන්ඩ් රික්වෙස්ට්" දමා ඇති නමුදු ඔහු තවමත් ඊට ප්‍රතිචාර දක්වා නොමැත. එසේ ප්‍රතිචාර දැක්වීම අත්‍යාවශ්‍ය නොවූවද ඔහුගේ මිතුරු සමාගමයේ මගේ මිත්‍රයන් බොහෝ පිරිසක් ඉන්නා බැවින් මා එසේ ඇතුලත් නොවන්නේ කිසියම් හේතුවක් නිසාවෙන් නම් ඒ ගැන මා දැනගත යුතු යැයි මට සිතේ. පෞද්ගලිකව මා ද මට අවශ්‍ය අය පමණක් තෝරා බේරා මිතුරු සන්තවයේ තබා ගැනීමේ මට ඇති අයිතිය ක්‍රියාවේ යොදවන්නේ එලෙස දිගින් දිගට රික්වෙස්ට් එවන කිසියම් තැනැත්තෙකුට පැහැදිලි කිරීමක් කිරීමෙන් ඔහුගේ මිත්‍රත්වය මා ප්‍රතික්ෂේප කරන්නේ මන්දැයි පෙන්වා දීමෙනි. සමහර විට මේ අය බොහෝ විට මුහුණුපොතේ මන්දගාමී ක්‍රියාකාරිත්වයක ඇති හෙයින් ඔවුන් අල්ලා මිතුරු දමේ ගැට ගසා ගැනීම පහසු නැති විය හැක...


අනෙක් අතට මුහුණු පොතේ ඉන්නවා යනු එහි ඉන්නා ඕනෑම කෙනෙකු සමග මිත්‍ර සන්තවය අතාත්වික තලයක සටහන් කිරීමට කැමැතිය යන්න කියා පෑමක් ද නොවන වග සිත් තබා ගත යුතුය. ඇවැසි කෙනෙකුට ඇවැසි කෙනෙකු මිත්‍ර තත්වයේ පවත්වා ගැනීම හෝ නොපවත්වා ගැනීම තීරණය කිරීමේ අයිතිය ඇති බැව් අපි පිළිගත යුත්තෙමු.

Monday, October 11, 2010

ගොනෝරියා වුවද...[18+]

ගොනෝරියා වුවද...



ශිෂ්ණය මත රූටා යන
සුදු කැරපොත්තා
සිය සියුම් පාද ස්පර්ශයෙන්
නිමවා මනස් සිතුවම් තුනු විල
විසිරී යයි ශුක්‍ර ධාතුව
බීඑම්අයි සී එච් ඉදිරිපස
වතුර මල ලෙස
උත්සව දවසට ඉහිරෙන

ශුක්‍ර ලා‍ටු මැද ඇලී සිය අඩු
කැරපොත්තා ගාටයි
බිම
ඇදි ඇදි මරණය අභිමුව
අතැතිව ටිප් එක

සුරතාන්ත නිමවැ
අහ්ලාදයකි පුස් ගඳ වුවද වටපිට

අහෝ ශීතල තාරුණ්‍යය!
නැත ගැහැණියක සතපන්නට
පොලිතින් ලූ බූරු ඇඳ මත

බිත්ති දිගේ අහුමුළුවල
සැප දෙන කැරපොතු සියුම් පාද මිස
සම්භාහනය පිණිස ඇති
තවත් මේ මලකඩ සිරුරු එක දිගටම

පෝලිමේ එත යත
කැරපොතු ලාටු තැවරුණු
ඉදීමි ගිය ශිෂ්ණ මුණ්ඩ
රෝහලේ මැසිවිල්ලේ ලතවන

"ගොනෝරියා ද යකුනි මේ
අනිමු ඉන්ජෙක්ෂන් පුක දෙපස
දෙන්න තොපට හොඳම පාඩම"
ඩෝස් ඩෝස්
දොස්තර ඇස් ගිනි පුපුරු විසිරෙත

"අහෝ දොස්තර සබඳ!
නැත එවැනි අනුරාගික කැඳවුම
ගණිකාවන් අධික වියදම්ය
යන්නට සිදුව ඇත්තේ එබැවින
කැරපොතු ගුහාවට ය සෙයිලම"

මේ කැරපොතු ඛේටය
අවුලුවා ඇත මුණ්ඩය
කැරපොතු කෙල හැලියේ වණයට
තරග දෙන
ගොනෝරියා වුවද
සැපතකි එක අතකට

ඩෝසන් ප්‍රීති
10/2010